Wi snackt platt Folgen

Bi "Wi snackt Platt" vertellt wi dütmal mehr över dat ne’e Stück "Barfoot in'n Park" in’t Ohnsorg-Theater. Dorto geiht dat ok noch üm dat ne’e Live-Album vun’e Sängersch Norma, wi sünd in Sülldörp to Besöök, wo en sik bi Buer Timmermann en so nöömten Saisongoorn meden kann, un dat geiht üm dat Verleger Ehpoor Gesche un Peer-Marten Scheller – de twee sünd de ne'en Priesdrägers vun den renommeerten Quickborn-Pries vun’e Hamborger Quickborn-Vereenigen. Moderatschoon: Jan Wulf

Bi "Wi snackt Platt" geiht dat dütmal veel wat üm Snacks op Platt, de ok de Hoochdüütschen kennen un bruken doot. Woso seggt wi egens sowat as "nu is Daddeldu" oder "Foffteihn maken"? Wat stickt achter düsse Snacks, wo kaamt de her? De Antwoort dorop gifft dat düssen Sünndag bi "Wi snackt Platt" to hören. Ketelklopper-Platt Un denn vertellt wi Jo bavento ok noch, wat dat Ketelklopper-Platt is, wo dat herkummt un wat dat dormit op sik hett. Henning Voscherau, een vun uns vörmalige Börgermeesters, hett dor fröher ok al mal in en Börgerschopsitten vun vertellt hatt. Mehr dorto gifft dat Sünndagmorgen op'e Ohren halvig negen bi NDR 90,3. Moderatschoon: Jürgen Fitschen De Leder in uns Sennen: Ove Thomsen - Regen in'n Kopp Charmonia - Help Wiebke Colmorgen & Hardy Kayser - Maak ik morgen Ina Müller - Dörp Reggae Nick, Yared & Floy feat. The Charchullas - These boys must be free

Sien eerste Gitarr hett he in't Öller vun ölben Johr kregen. Nu is Ledermaker Willie Stemwede, de in Hamborg-Rahlsteed tohuus is, al siet mehr as 50 Johrn in'e Hamborger Musikszene ünnerwegens. Vele Johrn hett he Folk-Musik, tomeist op engelsch, maakt. Man ok dat Plattdüütsche - sien Moderspraak in'n besten Sinn, wiel dat sien Moder ut Oostfreesland keem - hett em nie nich loslaten. Bannig vele Songs hett he in'e verleden Johrteihnten op Plattdüüütsch schreven. Leder, de vun dat Meer, den Wind un de wunnerschöne Natur hier bi uns in Norddüütschland hanneln doot. "Broder Wind" - Willie Stemwede sien eerstet Album op Platt "Wind un Meer", "Kumm mit lang" un "De Storm", dat sünd blots dree vun de Leder, de dat nu op Willie Stemwede sien eerstet Album "Broder Wind" op Plattdüütsch to höörn gifft. Bi "Wi snackt Platt" vertellt he mehr över sik un sien ne'et Album un, kloor, dat gifft ok den een oder annern Song dorvun to höörn. Een Leed över de Lüüd op den Rahlsteder Wekenmarkt Un noch en anner Leed op Plattdüütsch, dat nich op Willie Stemwede sien ne'et Album mit op is, warrt Willie Stemwede bi "Wi snackt Platt" spelen: een Leed över den Rahlsteder Wekenmarkt! Siet vele Johrn is Willie Stemwede dor sünnavends mit siene Gitarr to beleven. De Song, den he hen un wenn ok in de Schweriner Straat to'n Besten gifft, hannelt vun de Verköperinnen un Vörköpers op den Wekenmarkt: vun de Veerlanners ut Karkwarder, vun Olli un siene Appels, Mustafa un siene Paprikas - un Aal un Kabeljo vun Fisch Schloh. Henwies: An'n 24. August, namiddags Klock 4, warrt Willie Stemwede sien ne'et Album dat eerste Mal vör Lüüd präsenteern: in't Kulturwark in Rahlsteed (Boizenborger Weg 7). Passlich to de Musik gifft dat bi düt Kunzert ok Gedichten to höörn - vördragen vun Joachim Sassen. Korten för dat Kunzert gifft dat nich vöraf to köpen, sünnern blots an de Avendkass. Moderatschoon: Jan Wulf